相信到咗二十一世紀,大家都應該已經轉用電郵去投寄履歷。如果你仲用緊郵寄,我會建議你可以環保啲,因為我地HR每日都會有個薯仔專員檢查電郵信箱,想快人一步理想達到,都係用電郵啦。
不過唔知大家記唔記得電郵已經係上世紀嘅產物?喺上世紀申請呢個電郵信箱時,你又記唔記得設定咗個乜嘢名俾自己呢?試諗下如果邪惡嘅人事部同事打開你封郵件見到你個名叫BB豬、靚仔明,好彩嘅咪笑兩聲,唔好彩嘅就秒掉資源回收桶喇。唔知咩名會被秒掉?我就見過以下呢啲:
1. 林蠔油
淋紅油我就有聽過,淋蠔油太絕喇,唔知要買幾多枝蠔油先夠淋?咁樣追債會唔會成本太高?
2. 水母羊咩
我估計呢種係水母混合羊咩咩嘅新品種,但到底係海洋生物定係陸地生物?不過我諗應該係異形「地球好危險,你都係返火星啦!」
3. 地球先生
地球先生你好嗎?你點解要搵工嘅?你唔係要負責自轉嘅咩?
4. babyloveman
呢類邊個love邊個嘅電郵名都幾常見,可能情侶愛到濃時係要申請電郵地址,不過你地嘅愛情故事同搵工無關,請收起你嘅愛意。
5. 我是忍者
你是忍者?我地公司冇請忍者,不過你係用劍定用殺蟲水先?我地公司要滅蟲喎。
6. 阿峰大俠
大俠!久仰大名!請問咩風吹你嚟呀?要飲啖茶食個包嗎?
7. 月野兔
美少女轉身變已變成戰士!一睇你名字就知道你閒時喜歡警惡懲奸…呀…不過我地呢份工需要輪班,時間好唔穩定,你會唔會考慮辭咗美少女戰士份工先?
8. 권지용
雖然我都睇過吓韓劇,知道呢幾隻字係韓文,但呢度唔係韓國,你都係講返中文啦!
除咗設定嘅名字,電郵地址都需要留意。如果電郵地址係類似咁樣,你可能要考慮開一個新帳戶:
piginloveXX@……又係情到濃時開電郵
ironman_heroXX@……Ironman你咁有錢駛乜搵工,攪掂你班復仇者先啦
killer.mingXXXX@……好驚驚,我地唔請殺手㗎
moneymoneyXX@……唔知要幾錢先請得起你呢?
beckham7manuXX@……唔好意思,個interviewer係利物浦球迷,所以係咁先
如果你唔想封信被秒速掉落資源回收筒,麻煩大家寄信前檢查一下你電郵設定嘅名字同埋電郵地址喇。
原文刊於HR小薯蓉專欄@JUMP職場生活雜誌