每間公司出bonus嘅日子都唔同,有啲年尾出,有啲年中出,有啲過年出,有啲就季季出。雖然季季有得出嘅話我都會舉banner熱烈歡迎,不過每出一次bonus,HR嘅工作量就會好似做兩次payroll咁。一個月做一次payroll已經攞你命3000次,如果每季一個月做兩次payroll,攞你命程度連聞西都發明唔到。
好多人話「超,payroll?㩒個掣就得啦。」
老實講,我真係唔識逐個step解釋畀你聽,只有做過嘅人先會明白,做一次零錯誤嘅payroll,當中花嘅功夫有幾多。
講返出bonus,正常公司都會出一封official公司信畀每一位同事,通知佢地會出幾多bonus。假設公司有一千人就有一千封信,HR當然要確保電腦嘅數字冇錯,同時為咗確保print出嚟都冇錯,基本上每一封信都要有人check一次。Check完之後甚至要好似工廠工人咁入信封,如果你公司有部先進嘅摺信機,就真係要多謝老細皇恩浩蕩!如果冇⋯⋯大公司嘅HR同事分分鐘摺到對手流曬血。
當同事收完封信,望一望個數字,封信嘅歷史任務就咁完結。但大家每年手上面拎住呢封一隻字都冇錯嘅花紅信、銀行一蚊都冇少嘅數字,當中都唔知累積咗幾多經驗、幾多血汗淚水、OT唔知幾多晚先做到出嚟。
就算睇到個數想撕爛佢,撕完都可以考慮拎去回收,請支持環保。