作為HR界嘅一粒薯蓉,身邊嘅朋友遇到HR有關嘅難題都會兩脇插刀,有問必答。諗諗下,其實人人都有機會返工,無論係老細定薯仔,點都會有啲HR嘅疑難,所以有個HR嘅朋友仔旁下身,的確係幾正嘅!
1.面試特訓
每次去見工都淆底嘅朋友有福了!去見工前,HR老友可以幫你扮interviewer,做幾次模擬面試,問到你口啞啞之後仲幫你度埋問題加答案,淆底獸都變自信怪。見工前幫你做足準備,包你一日收幾個offer。
2.專業執CV
HR日日睇CV,已練成速scan CV大法。你份CV是龍是蟲佢一眼就睇得出。佢會傳授你CV吸睛大法,間吸睛又得,慢慢吸睛亦得。畀佢執過份CV,見工機會大增500倍,去緊廁所都有人電話嚟叫你去見工。
3.免費法例咨詢
「家下我劈炮,幫我計下有幾多代通知金。」
「幫我算下邊日係遞信吉日!」
「老細唔畀我去廁所,可唔可以告佢?」
遇到勞工法例有關嘅難題,佢會即時為你提供法律意見,一秒解決你疑難,好過打去勞工署聽埋啲官腔答案。有呢個老友就唔駛自己打畀勞工署,123 唔駛諗,Call佢啦!
4.傾心事好對象
平時喺公司,同事臨別秋波都會去HR做個exit interview吐下苦水。因為平時開解人經驗豐富,放咗工都成為大家嘅傾訴對象。無論喺惡頂老細、三角關係、家庭糾紛、學業退步、馬場失意、金融風暴,佢地都係絕佳嘅傾訴對象,年中都成功阻止唔少悲劇發生。
5.有咩都幫你拆掂佢
HR平時喺公司接觸到好多唔同領域嘅專業人士,一早同佢地打好曬關係。遇到HR以外嘅問題,佢一樣可以搵人幫你拆掂佢。搵葉X鄧之前不如搵咗你HR老友先啦。